2008年7月30日星期三

我的新相機 ~ Canon G9


自從買左部Sony手機之後, 就一直影乜都用手機, n年前果部DC都無用, 因為質數比部手機還要差,顏色出得好奇怪, 所以我話唔會再買卡片 DC , 因為d相影得唔靚~ 單反機一來太貴 & 拿出街不方便, 又想相片質數好, 又懶, 諗左幾個月, 都係買Canon G9, 雖然係遲左d, 但都叫真係買左部想要既機 ~
去左好多間電器鋪, 最後 以 $3830 買, 包4G卡, 備用電, 腳架, 相機袋 (但我要買過, 因為放唔落的), 保護貼....

跟住我第二日即刻去海洋公園試機 ~ 效果滿意 ~ 但仲有好多野玩, 最正係有 Manual mode, 有單反機既感覺 ~ 正 !!

2008年7月21日星期一

抹茶雪芳蛋糕


今次又跟"好吃戚風輕鬆上手"本書整左抹茶雪芳蛋糕, 又用左宇治既綠茶粉, 顏色都幾靚, 好綠下, 呢本書教人整雪芳蛋糕真係幾輕鬆...又唔需要太多材料, 非常簡單又好味 ~~



食落好軟熟, 抹茶味可以再濃d , 但可能唔夠勻, 仲有d位置是深綠色既...有待改善...







切開之後個樣 ~~

2008年7月18日星期五

豆腐芝麻慕絲+蘋果金寶芝士蛋糕 ~ 奶奶生日 (附食譜)

17號奶奶生日, 一家人出去吃飯當然仲有生日蛋糕, 因為今次我阿媽都過黎, 所以又整左兩個蛋糕, 因為驚唔夠食...我用左大契送既 mousse ring 比我 做左個豆腐芝麻 mousses cake, 呢個餅既食譜我夾硬自已配的, 因為我搵唔到同一個餅有齊這兩款味既 mousses。

食譜如下

餅底:
Oreo餅碎  60g (我用左 90g餅)
牛油     30g (我用左 45g油)
部壓碎加入牛油溶液拌勻,壓成餅底, 雪硬

芝麻糊 :
淡忌廉     200g
糖       20g (我想可以甜d)
芝麻糊粉    133g (其實應該 33g 都夠....)
吉利丁(魚膠片) 5g
水       37g
芝麻Mousse做法
(1)淡忌廉加入糖,打至企身
(2) 加入芝麻糊粉,拌勻
(3) 魚膠粉加入熱水中拌勻至完全溶解,加入Mousse糊內,拌勻放入模中。

豆腐糊:
百福豆腐 ----200g (可以甜d用豆腐花)
淡忌廉 ---- 120g
糖 ---- 35g
水 ---- 30g
魚膠片 ---- 5g
(1) 豆腐/豆腐花用打蛋器打至完全碎散,然後加入砂糖拌勻,備用
(2) 忌廉打約至6成(流質有微紋), 然後放入剛攪溶的豆腐中造成豆腐漿,備用
(3) 魚膠隔熱水座溶後慢慢加入豆腐漿內(邊加邊拌勻)
(4) 倒入餅模,(如有需要可中途放入椰果), 放入雪櫃雪一小時,脫模即成.

Comment :
個賣相還可以, 用蛋糕底會好過用餅底, 因為餅底唔係咁夾, 另外個芝麻 mousses 太實, 我懷疑芝麻分量過多同埋唔夠甜, 有苦味, 兩個 mousses 既質感分別太大, 豆腐果層都 ok 但家人話唔夠甜, 可以再甜d...不過我自已其實麻麻地食 mousses, 不過生日餅就會靚d, 大強又話我點解食到有芝士味, 又無豆腐味....阿仔話唔食d芝麻味, 要食d士多啤利同"芝士"....天呀 ~~~ 點解會變左芝士蛋糕架 ~~~
我估可能都係唔夠甜之故...可能生果配 mousses 會比較好味。

同場加演多一個玉桂蘋果金寶芝士蛋糕

(6"模蛋糕)
餅底
消化餅 60g / 無盬牛油(溶液) 30g / 玉柱粉 1/8茶匙
1. 壓碎消化餅
2. 加入無盬牛油及玉桂粉拌勻
3. 放入模底壓平成餅底,待用
金寶脆面
麵粉 45g, 黃糖 30g, 無盬牛油(硬身) 18g, 玉柱粉 1/4茶匙
1. 無盬牛油切粒,加入己篩之低筋粉,用手混合搓成粒狀
2. 拌入黃糖及玉柱粉,待用
餡料
忌廉芝士 300g, 糖 60g, 雞蛋 100g, 雲呢拿油 1/4茶匙, 蘋果 1.5個 (我用左青蘋果)
1. 預熱焗爐至 200C
2. 忌廉芝士與糖打至軟滑,加入雞蛋及雲呢拿油拌勻
3. 蘋果去皮切粒拌入芝士餡內, 倒入模內,待用
4. 將金寶脆面灑上餅面,用 200C 焗 40-50分鐘,放涼後脫模,最後在餅面灑上防潮糖霜即成

呢個餅比我想像中好味, 糖可以減d, 青蘋果同芝士都幾夾, 我阿媽話個樣唔得但好味, 我話點唔得法, 佢話個面如果無燶就會好啦...最衰我無睇火去左沖涼...

最後阿仔order 既呢個cheese cake 佢一啖都無食到...因為佢已經飽晒同埋好眼訓 ~~


2008年7月14日星期一

藍莓&紅莓鬆餅

呢個係 Blueberry muffins

呢個係 Cranberry Muffins

星期日又整餅, 無出街因為又落雨, 整左在二記買既藍莓鬆餅預伴粉, 味道都ok, 不過假假地, 於是又跟 RTHK 個 紅草莓鬆餅 (Raspberry Muffins) recipe 改左做個紅莓 (Cranberry) 因為見阿仔有d紅莓乾淨左, 於是攞黎整。呢個食落鬆化好多, 可能因為用左牛油, 其實預伴粉雖然方便, 但無左果種整餅既樂趣, 所以下次都係唔用現成野好d ~


法式檸檬蛋糕

星期六, 阿仔契媽黎到, 整個餅比佢嘆下, 我係跟 RTHK 果個 recipe 做既, 完先係4個 4.5 吋既撻模, 我無咁細個, 用左9吋模, 個餅有d薄同埋比較脆口, 建議可用8吋批模, 但呢個味道就 very good, 好清新既檸檬味, 又簡單, 老公話好味呀, 阿仔契媽, 契姨 都話要整返個食下 ~

木糠布甸 (附食譜)


星期五晚去左二記買材料, 於是整左個木糠布甸 ~~
我用左為食貓既 recipe 但改左如下 :
瑪莉餅 (marie biscuits) 150克
淡忌廉 250毫升
煉奶 50克
雲呢哪條 1條 (取其籽)
糖 1/2湯匙
預備 :
1.)先以攪拌機打碎瑪莉餅,備用。
2.) 切開雲呢條,用小刀取其籽,備用
3.) 高身 Jelly 杯 5個
做法:
1.) 將忌廉打勻至軟(6 成企身),再拌入煉奶、雲呢籽及糖至 8 成企身(好似軟雪糕狀),拌勻。
2.) 將瑪莉餅碎先鋪在杯既底層,然後放忌廉,用湯匙鋪平,再鋪 上一層瑪莉餅碎,如是者以「梅花間竹」的方法填滿,最後留面的是餅面層。
3.) 然後放進冰箱(freezer),待雪硬即成。
但我落多左糖, 所以食落甜左d, 餅碎多左d, 但個 cream 好好味, 好似食雪糕咁, 正 ~

2008年7月7日星期一

再戰香蕉戚風


D 香蕉熟晒, 於是再整香蕉戚風啦, 今次跟本蛋糕書既 recipe 整, 味道好過上次同埋方法比較簡單 :
材料 :
蛋黃 3 隻
香蕉 80g
牛奶一大匙
糖 : 60g
菜油 : 50ml
蛋白 : 4 隻

做法 :
1.) 先將香蕉用叉搗爛, 加入牛奶拌均
2.) 蛋黃 + 1/3 砂糖伴均 , 加入菜油, 再加入 (1)
3.) 蛋白加其餘 2/3 砂糖打超成泡沫狀
4.) 蛋白霜分三次加入 (2)
5.) 放入 17 cm 直徑的戚風蛋糕模. 180度火焗 30 分鐘, 出爐後要倒扣待涼脫模

Sze & Raymond's Birthday Dinner

上個星期六先係正日, 但要同家人慶祝, 唯有延遲一個星期, 我地去左蓮香樓食今次既生日飯 ~ 爸爸練住個鼻係因為阿契契手上既"榴蓮蛋糕", 當我地切開呢個蛋糕時, 全場食客都投以奇怪的目光望往我地...好彩有另一個大契又一力作" 士多啤利忌廉蛋糕" 作為掩飾...先無比人投訴。

我地有成17人出席, 分左兩圍檯 ~ 所以我地都各自叫野食 ~ 個軟殼蟹超好味呀 ~~~ 仲有小唐菜鍋餅都好好味 ~


呢個就係大契整比細契既榴蓮飄香蛋糕 ~~~~

大強都唔敢吃, 怕牙痛喎 ~~
大契另外整左個好靚既士多啤利蛋糕, 好靚呀, 超 Pro ~


入面仲好靚添呀 ~~~

2008年7月2日星期三

楓糖戚風+朱古力楓糖戚風


7月1日放假無野做又整餅, 阿仔想encore 朱古力蛋糕但費事無人吃, 我又想吃楓糖味, 於是來一個一式兩味 ~
因為同一時間焗, 楓糖果個面有d 燶燶地, 但入面好鬆軟呀 ~ 不過都係唔明點解都係有d濕濕地, 唔通係個模既問題, 因為朱古力果個又無濕喎 ??
最後阿仔食左一啖朱古力蛋糕...佢話唔好食..於是就無食...但我吃落覺得好好味, 今次甜過上次香蕉果個, 亦都吃到有楓糖既味道, 爸爸都話楓糖戚風好味, 好過香蕉, 今次反而係我阿仔唔幫診....