2008年1月24日星期四

聽日好開心

25 號啦,終於等左成年啦,因為係出雙糧的好日子,仲有係 姐卵演唱會出碟的日子,仲有我會有個重大的決定都係會聽日做,希望所有野都順順利利。

2008年1月19日星期六

阿華同阿敏結婚










1月18日係阿華同阿敏結婚的大日子, 佢地係佐敦莊士倫敦廣場彩福皇宴擺酒, 個場好 Grand ~













呢個就係我地坐果張檯 ~









大強是日幫手做兄弟









宴會既Menu









好有用既回禮禮物, 你係一個可以放茶葉既音符,用黎沖茶, 好有心思.












鬼馬既新郎哥阿華



呢個咁特別既出場方式我都係第一次睇 , 阿華表現得好好, 新娘子阿敏都感動到講唔到野, 現場有樂手演奏, 仲請左好多好朋友上台獻唱, 仲有阿華個叔叔, 都唱得好好聽, 成晚節目都好充實, 不過新娘子可能太忙, 同唔到佢影相添.

我地睇住佢地拍拖, 而家結埋婚就快D生返個, 在此祝佢地百年好合永結同心永遠都咁恩愛 !!!

2008年1月18日星期五

我部電腦終於好返

部電腦早幾日 Format 重裝 Window 都 開唔到機,其實部機都唔穩定,想換好耐,平均一個月都要重裝一次,真係好煩,個cpu又成日超熱。最後叫左陳先生幫我地睇下部腦發生什麼事,原來個cpu 散熱器一路都裝得唔穩,故開唔到機,而家終於好返,真係唔該陳先生。

2008年1月14日星期一

Darth Vader 請小朋友食雪糕

阿仔新作, 題目 ~ Darth Vader 請小朋友食雪糕

生力wild day out grand show 2008


2008 年 1 月12 日,去左九龍站 PopTV Arena 睇WDO grand show, 今次係我第二次睇,第一次睇有被陳綺貞吸引,佢唱live實在太正 !!!,今次都係有佢,所以我想睇 !!

今次歌手包括 :

我14:00 入場,已經唱左幾隊,但當時氣溫達攝氏25度,烈日當空應該唔止,話晒一月喎,點解咁熱架...

Sodagreen蘇打綠 ~ 我第一次睇,個主音把聲好正,可以唱到好高key, 歌都幾好聽,有D 似 Splitz


恭碩良 ~ 無出到

張繼聰 ~ 經典懷舊金曲 medley, 我最鐘意 "Electric girl" 正 !!

何超 ~ 唔係好知佢唱什麼 ~

朱凌凌 ~ 整個下午show 最正係佢地,佢地好識攪氣氛,D歌又正。" Don't touch my woman" 實在笑爆,overun 左仲唱多首"李白",整日我諗佢地唱得最多首歌 !

農夫 ~ 睇唔到,因為第一個出場

周國賢&Zahran ~ 中規中距,周國賢把聲唔夠rock

929&黃玠 ~ 929 好正喎,個牧童笛(唔知係咪) 好清新,想買隻碟聽下,黃玠就類似呢D清新feel ,都唔錯。

Kolor ~ 好band sound ! 個主音巴聲幾好 !

陳鳳&吳彤 ~ 不提也罷

黃貫中 ~ 壓軸出場,果然係本地band老大哥,因"飛落海" 已唱完,走左好多師奶&妹妹仔,個個都好high !!!! 首"踩界"越聽越好feel。

S.H.E ~ Live唱得不俗, 尤其和音部份

飛輪海 ~ 今次grand show最9唔搭8既樂團,但有一半人士為此入場

陳綺貞 ~ my favourite !!! 九份的咖啡店 及 旅行的意義 accoustic 版,把聲點解咁好聽 ?? 期待新碟


Takki ~ 無留心聽,去左買野

Tank ~ 我發現都係飛落海d fans 在叫,但我都欣賞佢係創作人,d 歌都幾好聽

楊乃文 ~ 把聲又係無得頂 !

蔡健雅 ~ accoustic 彈果首"Beautiful Love" 好好聽 !


范曉萱&100% ~ 還是喜歡以前既佢

盧巧音 ~ Live 好唔掂,失禮死人,成日鍊住個喉嚨唱歌

許懷欣 ~ 最好聽係唱佢老豆果首半斤八兩

24味 ~ 唱3首歌既歌詞不停重覆 "24味" 及 "wild day out", 老友,而家唔興咁rap 架啦 !

徐偉賢 ,鍾健威,陳皓恩 ,周吉佩、戴澴雨 ~ 無聽到






姐卵 World Tour 2007

終於等到啦 !! 足足等左3年,我偶像終於來港開演唱會啦,就講翻11月得知呢個消息,都問朋友借信用卡預購,但當我打通個電話時,已經無晒$480 門券,唯有問下有無人羅到飛或者等公開發售。

到左公開發售果日,都非常驚險,話說果朝早Sharie 打SMS 比我聽到收音機話當日公開發售,我即刻唔知點算,於是問佢借張信用卡打電話去URBTIX 電話訂飛啦,點知打好耐都唔通,都係lunch 落太古買飛算啦,一到lunch 飛的落太古通利,好彩得幾個人排隊,應該仲有飛賣,我偷聽到前後都係買Jay concert, 仲諗住同期仲有劉華concert, 應該都好多人買,但比我想像中少。

差唔多輪都我果陣 ~ Shit !!! "不接受EPS購買門券",我又帶唔夠錢,又無credit card, 諗緊唔知點算好,過左13:00 開始多人排隊,唔可能重新排過,於是打比在附近返工的Samuel , 但搵唔到佢,於是又打比ah wing, 但時間已經唔容許我再等,於是硬著頭皮叫後面個女仔幫我睇住個位,我以9秒9速度走返落地鐵度襟機,Samuel 打比我話去左西灣河食飯,但我已經襟緊錢,我再用9秒9跑返去通利,岩岩輪到我後面果個女仔,真係唔該晒佢,如果唔係佢幫我霸位,我買唔到等左3年既姐卵concert !!!!

最後我只買到$480 最後一行~~ 20 行,其他都已經內部應購晒,係呢到都要多謝Sharon 同買Danny , 無你地既幫忙我無可能買到另一場第一行既飛 !!!!! 真係唔該晒你地 !!!!!!

好期待終於等到果日,我分別睇12月7日 $480 (第一行),同埋 12月9日 $480 (第二十行)

12月7日係第三場,當日家賓係許志安,唱左睛天,都幾好聽,最正當然係自彈鋼琴自唱部份,同埋真係超近的關係,好後悔無帶相機,最遺憾係無唱到青花瓷,心雨等,男拳媽媽唱得太耐,搞到好多人去toilet, 同埋我鐘意以前果隊男拳媽媽多D, 而家好idol feel, 唔知做乜。

12月9日係第五場,原先係尾場,但後來加左兩將場變左唔係尾場,嘉賓係柯有綸,更加唔知有乜歌,當日最正係唱左籍口,自彈自唱"蒲公英的約定"實在大正 !!!!!! piano solo 太好聽 !!!!
另外仲有accoutic 版既霍元甲 同埋雙截棍,十分正及完全變左第二首歌,真係好勁 !

其實真係想睇晒咁多場,但經濟不能負擔,亦實在費事比人話我太癲既關係,睇兩場都好滿足,期待下次再黎香港開演唱會同埋佢套"功夫灌藍 !!

好耐無update 個blog

好耐無update 個blog ,因為太忙,又掛住玩facebook , 個電腦有壞左,可為鬼煩,我過年前實換鬼左佢 !!!!!!

換電腦有乜可好提意呢 ?買套裝機好定砌機好 ?我已經唔想再諗買乜野parts, 因為好鬼煩
!!!!