澳門一天遊

都未試過咁多人一齊去澳門, 我地一行11人一早出發啦, 仲早過返工 ~~

去到碼頭, samuel 發現d飛出左問題, 回程日期是第二日不是即日, 在碼頭擾攘左一陣但都唔比改飛, 我地唯有上左船之算....

到左 Macau, 我地諗緊好唔好賣比黃牛跟住自已買過張回程飛, 好彩佢地果邊肯換比我地, 今次真係有驚無險 ~

十點幾, 好多鋪頭都未開, 所以第一站我地去左"榮記" 食麵 ~ 但我地無人食麵, 叫左一碟"食送" 同埋豆漿 + 豆花, 碟"食送" 就一般啦, 個豆花仲係好好味, 但大強話飲杯豆漿好似飲奶咁, 覺得好怪, 梗係啦, 其實杯野唔係豆漿, 係"豆奶"至真 ~

食完榮記, 我地邊行邊影相, 行去大三巴, 影左幾張相, 但我地無上去, 之後去左帝鈞買左個胡椒餅食, 味道都ok, Jenny 就在潘榮記買左d 雞蛋薄片請我地食, 都幾好味 ~

跟住去左"盧家大屋", 由於是一間過百年既建築物, 所以我地一行咁多人, 個管理員都驚一次過咁多人上去會, 會"凜" 落黎, 我地係呢度係咁影相, 以前d屋真係整得好靚呀 ~~

去完大屋我地去左食去澳門必吃的"煲仔翅", 真係翅黎架 ~ 唔係假翅, 最平 $18 有交易, 真係抵, 但等左成個鐘有多, 但真係幾好味, 等咁耐都抵 ~~ 呢個係我地既午餐 ~

吃完翅我地去氹仔 ! 都係食野, 見大利來記既豬扒包超多人等, 期間我地去左"沙度娜"買"木糠布甸" 食, 但係無味既 ! 只有 cream 味, 我同大契都係覺得自已整既好味d, 佢仲要賣 $10 杯, 賺死佢....跟住去左另一間 "新好利咖啡餅店 " 我食左花生多, 佢地食左奶油豬, 好好味喎, 果度仲有燕窩蛋撻都好出名, 但我真係食唔落....

食完野原先諗住去遊覽下附近的名勝"龍環葡韻", 但落起大雨, 所以我地就去左"威尼斯人"酒店行街, 果度地方真係好大, 大到行幾個鐘都行唔完, 我地仲見到國際巨星 "馬拉雞" (Mariah Carey) , 估唔到佢真人唔肥個喎, 仲好好身材添, 不過佢比d實Q 圍住, 我地都埋唔到佢身 !

行下行下, 又已經到左食晚飯既時間, 我地 book 左下環區既 "船屋" 葡國戲廳食野, 可能我地人多, 每人都係$100 唔駛, 好抵食 ! 我個人覺得最好味係個炸馬介休球 ~~ 正!

食完飯都係20:00 , 咁岩是日澳門有煙花匯演, 男人們話要去飲野, 我地就去返新馬路果邊...我地幾個女子搭返巴士出去, 比我見到 "明記" 牛什檔, 我即刻叫大家落車, 同老細講唔該整串"牛蒡', 上次食$5 蚊超大串, 今次已經加到 $10 一串, 貴左成倍, 不過都係咁好食, 不過可能唔肚餓, 所以無上次食咁滋味....跟住又去杏香園食甜品 ~ 天呀 ~~ 好鬼飽呀 ~ 但唔食又對唔住自已, 我叫左個 "杏汁合桃露", 好味呀 ~ 但阿 Sharie 叫左個凍椰汁就超甜飲唔落, 不過呢間野d 阿姐態度麻麻地, 呢間野食熱糖水穩陣d...

跟住我地同班男人匯合, 佢地去左 "夜光杯" 我地行左好耐先搵到, 但估唔到佢地歎到一邊飲野一邊睇煙花....我地去到既時候剛好於完...激死....
呢度飲野都幾好, 有 live band,表演, 個男主音仲好似阿 "吳賣將" 不過有肚腩既~ 哈哈 ~ 佢仲唱左首"愛我別走" 比我地呢班香港黎既遊客添....

坐到差唔多係時候要走啦 ~ 今次既旅程都叫順利啦, 希望下次有機會再去過 !~~ 更多精彩照片請去以下相薄

http://s180.photobucket.com/albums/x55/ahpei988/Macau%20Trip/?albumview=slideshow

password : 我個英文名

SAS 真夏的大感謝祭 ~

好想去日本睇既演唱會 ~ Southern All Stars - 30週年真夏的大感謝祭 ~ 無機會親身去睇, 唯有在網上欣賞 , you tube 收錄左5 段整個演唱會既片段, 都非常精彩 ~

都唔知點解每次唱 "真夏之果實", D 人就一定喊, 雖然我唔知佢唱乜, 但叫到樂迷睇得咁投入, 個個都流晒淚咁, 場面都真係幾感動 ~

網上已經有得 BT整個 live, 但file 大, 有排 load ... 不過我都會買 DVD, 不過唔知幾時出

比d片段大家睇下 ~~

長崎蜂蜜蛋糕+抹茶蜂蜜蛋糕+反沙芋

又上Winnie 姐既堂, 今次係整長崎蜂蜜蛋糕+抹茶蜂蜜蛋糕, 想試好耐但知道有d竅門, 所以想學 ~ 因為個蛋糕要好多時間焗, Miss 即場教我地點整潮洲甜品 ~~ 反沙芋 ~ 原來材料好簡單, 就係糖同芋頭 ~ 但超好味 !!

我地一組既同學仔打緊D雞蛋 ~

焗好啦 ~ 長崎蜂蜜蛋糕呀 ~ 好香Honey 味 ~~
呢個係抹茶蜂蜜蛋糕 ~ 都好香抹茶味 ~~

就係呢個反沙芋啦 ~ 出去酒樓食成日都話唔整架, 又話要預訂呀各樣那樣, 自已整材料都是十蚊八蚊, 不過要好有心機同埋時間要掌握得好好, miss 都要整三次先得 ~ 但第一次果整果d 拔絲芋頭我都覺得好好味 ~ Yummy !!

凰梨卷 (附食譜)

較早前在網上幾經辛苦買到凰梨卷個唧模, 今次買晒材料, 可以試下整呢個 Jenny Barkery 要預訂成個月, 排4000 人, $80 得 17 粒既甜品 ~~ 凰梨卷 ~

今次既材料有 (做到五十幾粒) :

三角金罐牛油 : 125g

麵粉 : 220g (我覺得190g都ok)

糖霜 :30g
雞蛋黃 : 1 隻

雲呢拿香油: 1/2 茶匙

餡 :

現成鳳梨餡 250g (可以自已整但煩, 所以買現成)

做法 :

1.) 將午油同糖霜用攪伴器伴勻, 加入雲呢拿香油

2.) 加入蛋黃攪勻

3.) 分數次篩入麵粉攪勻
4.) 放入鳳梨模唧筒

5.) 取出 5 ~6 g 鳳梨餡, 圍住粒餡唧包住個餡一圈

6.) 掃上蛋汁入預熱了的焗爐 170 度焗15 分鐘至金黃色即成 ~

我自已食過 Jenny Barkery 果d, 自已整果d一樣咁好味, 駛乜出去買~~ 因阿仔學校生日會, 我將製成品比阿仔拎返學請小朋友食 ~ 不過唔知佢地覺得好唔好味呢 ~

我就係用左呢隻牛油整架啦 ~
餡就用現成, 都唔太甜, 幾好味 ~

Miss Irita 老師攪的 Gathering Party

因為今年 Heaton 既英文老師 Miss Irita 離開左學校另有發展, 但又好掛住一班可愛的小朋友, 所以攪左個 party, 我地在銅鑼灣既 small potato cafe 包左個場, 可以玩3 個鐘, 地方唔係好大但都好多野玩, 各款遊戲機, 棋類, 美式足球檯, 卡啦ok....食物都得喎, 尤其是炸魚薯條果d 薯條, d醬汁好好味, 在場既職員又會同小朋友玩遊戲, 氣氛唔錯, 好似去左人地屋企開 party 既感覺, 第時開 party 又多個 Choice ~~
在呢度都好多謝 Miss Irita 咁有心攪呢個聚會, 又咁錫 Heaton , 雖然 Heaton 係學校見唔到你, 但希望 keep in touch 啦 , 得閒就攪下呢d party 啦... Heaton 不停話個生日會好好玩 ....

網上相薄 : http://www.fotop.net/smallpotato/20080915bd

芝麻戚風蛋糕

今次整左芝麻雪芳蛋糕, 係跟輕鬆上手果本書既食譜, 用左要黎搽麵包果隻芝麻醬整 ~ 非常正呀, 好香芝麻味同埋唔駛落油, 呢個蛋糕好健康, 又好味, 不妨試下 ~~

鐵人工程之冰皮月餅

經約左阿仔契媽話今年一齊整冰皮月餅, 之前已經為左唔知整乜野味有d煩惱, 諗住整一般綠豆餡同埋奶皇餡。但整呢個冰皮真係鬼咁辛苦, 因為我地整足13 個鐘, 超級攰 !! 我星期五晚己經將d 豆浸定先, 我買埋白豆諗住做抹茶餡, 因為我買左個攪拌機, 順便試下部機得唔得。

星期六我地去買埋材料各樣, 都要下午3點幾先開始, 首先就做個餡先..因為我地兩份分, 所以綠豆可以整到3份, 其中一份加左吉士粉, 變左奶皇咁, 索性當奶皇餡但就甜左d, 另外兩份就普通綠豆餡, 即刻減糖, d餡分左三次抄, 好鬼攰。

最後一份白豆沙就試用新買既攪拌機, 但可能攪得唔夠耐, 所以仲有d粒粒, 呢隻豆浸左成晚, 又要去衣，煮好耐都唔爛, 都幾煩, 最後大家都同意將佢變成抹茶餡, 於是4 份餡就完成左 ~

跟住整個皮啦, 我地整左 普通冰皮同黑芝麻皮, 個黑芝麻皮勁香, 同埋原來要蒸熟左先會深色, 同大班果d 一樣 ~

最後吃完晚飯我地先開始包月餅, 但我地遇到史無前列的挫折, 因為其實我地兩個都未學過, 又唔記得買手套, 全程用保鮮紙已經好唔方便, 再加上我地都未沾粉就入模, 攪到個月餅出黎既時候"面目全飛" 個 Hello Kitty 模"dun" 出黎變左歪面 kitty, 都唔知點算 ! 最後得知原來要成個麵團碌粉先得...我地先得以繼續.....不過都多謝阿仔契媽幫我手...如果我自已整我諗整通頂都似....不過我地都整13 個大既, 24 個迷你既, 手工方面有待改善 ...

味道食落都 ok ~ 係個餡唔夠滑, 仲食到有d 豆粒...大強話好似食緊糉....但味道我覺得 ok, 個奶皇甜左d但可以接受...

下年如果再整要諗過先....

輕便型碎肉攪拌器 ~ 買左啦

我一直都想買個攪拌機, 因為舊果部個蓋壞左同埋個刀片位好難洗, 見報紙話"舍粉"有得換, $138, 都幾ok ~ 於是即刻換左個, 但唔知好唔好用, 不過細細部就唔怕阻訂, 有時打下果汁咁都幾好...

崖上之波兒 ~ 宮崎駿

今日睇經濟日報副刊介紹宮崎駿新作《崖上之波兒》競逐金獅大獎, 受觀眾歡呼讚賞, 本片是一部妨照童話故事"人魚公主"為藍本。 波兒就是人魚公主化身, 爸爸是人類, 媽媽是海洋之母, 因一次意外被困在玻璃瓶內, 被一個5歲的男孩宗介救起, 繼而愛上他並希望成為人類....故事都幾吸引同埋去返"千與千尋"類型, 簡潔的故事不像"哈爾移動城堡" 般複雜, 期望香港快d有得睇 ~我估阿仔都會好鐘意睇 ~

Offical website : http://www.ghibli.jp/ponyo/

轉載:
宮崎駿《崖上之波兒》奪金呼聲高 「3至100歲都喜愛」2008-09-02
【明報專訊】日本動畫大師宮崎駿的競賽片《崖上之波兒》，前日在威尼斯影展舉行首映禮，雖然有內地傳媒批評故事流於簡單直接，恐怕無力問鼎金獅獎，不過，外國影評人卻給予極高評價，美國綜藝報章Hollywood Reporter更大讚：「此片極富幻想和魅力，由3至100歲觀眾都喜愛它！」看來要贏得本周末晚頒發的金獅獎，機會大增。
3年前憑《千與千尋》贏得奧斯卡最佳動畫獎的宮崎駿，日前獨力宣傳新作《崖上之波兒》，現年67歲的他深得國際傳媒尊崇，除了在記者會上獲特別安排座位，好讓滿頭銀髮的「宮崎伯伯」從容回答問題及拍照；當他出席首映禮時，甫進場即博得全場歡呼，沿途更有不少記者大叫「Miyazaki（宮崎駿的日文姓名）」，逗得老人家笑逐顏開。
電影播畢以後，全場觀眾起立拍掌，據報道有記者一邊哼着《崖上之波兒》主題曲，然後一臉滿足地離去，亦有觀眾以Ponyo（小人魚的名字）互相稱呼對方，看來這部動畫的感染力，絕對不可忽視，說什麼「無力問鼎金獅獎」的評論，更是不可盡信。
文：張晴

迷你月餅 ~ 個罐都好迷你 ~

就黎中秋節啦, 度度都賣月餅, 比起細個果陣, 而家真係多左好多款選擇, 有傳統既蓮蓉月餅, 奶皇, 同埋多到數都數唔晒既冰皮月餅, 冰餅我最鐘意食大班果隻, 個皮好好味, 第二間都係差d 野, 今年已經試左芝味黑魚子, 白玉荔人, 芝士味我麻麻地, 但唔難食, 荔枝味就幾正, 我會再買其他幾隻味試下 :P
早前行過奇華, 想買個奶皇月餅試下, 見到有個懷舊月鐵罐餅盒, 仲要係迷你裝, 是奇華70週年版, 入面有一個迷你金黃蓮蓉月餅, 盛惠$24, 因為太得意, 於是買左返去 ~~
呢個盒令我諗起細個果陣, 因為屋企人買開奇華月餅, 仲記得以前係用紙盒裝的, 我就唔係太鐘意食, 因為當時榮華出左白蓮蓉月餅, 覺得白蓮蓉無咁甜, 同埋貪新鮮, 都是靠親戚朋友送禮先有得食榮華同恆香果d白蓮蓉月餅, 屋企d奇華我就好少食, 但屋企人成日話金黃蓮蓉先至香, 好香蓮子味, 細個既我就唔識欣賞, 而家當然唔同啦, 因為而家無乜邊間有黃金蓮蓉月餅賣, 而奇華自已都因應市場既需要出左白蓮蓉月餅啦....所以呢個70週年迷你月餅罐都要買返黎留念下 ~~