酥皮叉燒飽, 脆皮菠蘿飽, 雪山飽

又去 Winnie 姐度學整酥皮叉燒飽, 脆皮菠蘿飽同埋雪山飽, 其實之前我已經在怪師傅度學過酥皮叉燒飽, 其實主要係想學個雪山飽 ~ 正呀 ~~ 我地4個人一組, 有阿仔契媽, yellow 小姐同佢妹妹 ~ 你睇下舊粉 ~ 勁搓 ~

我地放入鑊內令佢快d 發酵 ~ 你睇 ~ 已經發到好大盤 ~
將麵團搓成波波再第二次發酵 ~

呢個係叉燒飽個餡。跟住我地將叉燒放人麵團內再發酵...

在飽上要唧上酥皮 ~ 其實是"墨西哥" 上面果層野....

每人五個 ~ 準備入爐 ~~
出爐啦 ~ 成個"墨面哥" 咁樣 ~~

立即試食 ~~ 好味喎 ~ 個飽都好軟熟 ~

同一個飽底, 我地再整胞皮菠蘿飽 同雪山飽 ~ 呢個係 winnie 姐另外加既紅豆餡, 我地做左個記號, 但有d 不雅...

出爐啦 ~ 唔記得做記號, 所以唔知入面d 是乜野餡。

好靚既迷你脆皮菠蘿飽 ~

呢個係紅豆餡 ~

呢個係奶皇流沙餡 ~ 好正呀 ~~~

香濃焦糖巧克力塔 【Tarte au chocolat et caramel】

呢個香濃焦糖巧克力塔是偉哥既生日餅, 因為佢鐘意食朱古力, 我終於都有機會試整呢個 tart 啦 ~

我用左 Venus 既食譜, 因為本來佢做細 tart, 我呢個其實不是 tart, 是 pie, 我將佢的份量除2 就做左一個 7 吋既 pie ~ Venus 的食譜

底層係朱古力脆餅底, 中間是焦糖醬 (拖肥) , 上面鋪上軟滑朱古力, 我另外洒上金粉同可可胚牙 ~ 真係岩晒朱古力狂 ~~ 個味好夾, 雪凍d 食會好d , 因為無咁甜。

鳴謝阿 wing 提供相片 ~ 多謝 ~

白朱古力軟心熱情果慕斯蛋糕

姪女 Jess 5歲生日, 想整個發糕比佢好耐架啦 ~一來佢話鐘意食朱古力, 二來仲有材料剩, 所以整左呢個 cake , 重點其實係個生日牌 ~ 因為佢老竇話佢好鐘意荒失失奇兵入面隻獅子亞力 , 所以

今次就整左呢個朱古力牌比佢 ~ 點知大個得制, 仲大個個蛋糕, 唯有照放上去啦 ~但味道我覺得地獄蛋糕好味d , 因為無咁多熱情果既酸味, 但呢個就酸味效多, 同埋白朱古力軟心又無白朱古力慕斯咁好味…
不過 Jess就超開心 ~因為亞力蛋糕出面係無得買架 !!! 仲話6歲時要長頸鹿邁文蛋糕, 我話不如整個公主 cake 比你好過啦 ~ 佢話 ~ 都好喎 ~ Jess 鐘意 sleeping beauty...我要記住先...見到呢個公仔要買定先....

母親節獻禮 ~ 芒果忌廉蛋糕

又到母親節, 當然要襯呢個節日整返個蛋糕慶祝下 ~ 自從學完唧玫瑰花後都試過自已再唧, 今次終於有機會啦 ~ 我地今日有三個媽媽, 就係我奶奶, 我媽咪同埋我 ~~ 我地成家人去左八喜度食晚飯 ~

呢個蛋糕低用左芒果戚風蛋糕做底, 6吋份量但整左7吋模, 所以有d 薄....不過唔怕, 陣間中間層 cream 厚d.... 死啦 ~ 結合既時候邊高邊低, 但已經無得補救啦 ~ 算啦 ~ 心意搭夠 ~

用花唧咀唧花但出黎既效果花瓣唔夠大, 變左康乃馨多過似玫瑰, 不過都好, 應節呀嘛 ~
d 花唧左好耐...d cream 好快又溶, 下次要用牛油忌廉....

最後加左d 芒果波波在面再唧埋樹葉, 但爸爸話d colour 好似花塔餅同埋好 80's , 但好左個芒果夠甜, 蛋糕亦鬆軟 ~ 所以佢地食晒無野講 ~~

呢幅畫係 Heaton 畫黎送比我架 ~ 靚嗎 ?

三媽一子黎個合照 ~~

開班授徒 ~ 法式士多啤梨蛋糕 ~【Fraiser】

今次再次 encore 【Fraiser】, 不過係開班授徒, 花小姐個千金話要學整3月份生日 cake 之法式士多啤梨蛋糕 ~ 仲諗住佢咁孝順整比媽咪食, 但點知原來佢是整比朋友食架 ~ 不過算啦 ~ 出年自已整返比媽咪補數啦 ~

之前果晚去超級市場買士多啤梨, 一係就熟到就黎爛, 一係就成個乒乓波咁大, 太大糕整出黎無咁靚 ~ 但最後我都是揀左一盒長柄士多啤梨, 好大粒, 主要係比佢既香味吸引左 ~ 揸住個柄好似食緊波板糖咁, 阿仔勁興奮 ~

是晚爸爸出招, 整在薯仔焗雞比我地吃 ~ 正呀 ~~~

d雞好嫩滑 ~~

花千金話佢d friend 覺得個蛋糕好味 ~ 咁就好啦 ~ 最緊要好味 :P

本地一日遊

今次同埋阿仔, 大哥一家人, Jackie, Ringo, 樂樂同埋佳哥一行十人去左參加本地一日遊旅行團 ~

行程包括有屯門公園的爬蟲屋, 流浮山海鮮餐, 牛牛樂園, 摘士多啤梨 同埋薰衣草園 ~

天公做美 ! 好好太陽但又不是太熱, 本團導遊媚姨經驗豐富, 大家都玩得好開心 ~~
我地第一站去左爬蟲屋, 之前從來都未黎過, 亦都唔知道個公園入面有咁靚既爬蟲屋, 入面住左好大隻既盾臂龜, 真係好大隻, 可以坐一個小朋友上去 ! 除左盾臂龜之外, 仲有印度星龜同埋價值不菲既鑽石龜, 唔同品種既蜥蜴, 大蟒蛇, 鱷魚等, 雖然地方唔大, 但出面個草地好正, 非常翠綠 ~ 我地係呢個草地上都玩左好耐下, 行完之後我地就人流浮山啦 ~ 因為食頭圍, 我地 11:00 去到行下海味街先 ~ 11:30 先至開飯 ~
是日午餐都不過不失, 有蝦, 有魚, 有雞, 仲有鮑魚仔 ~ 不過d 餐具就好多油, 我隻碗仲痴左粒飯….我估佢就咁浸一浸水就算, 根本無洗過…不過百幾蚊都無得計咁多….

食完晏我地就去牛牛樂園, 呢度d 牛是黎自紐西蘭, 每位團友都有一杯仔牛奶試飲 ! d 奶好好味喎, 唔羶 ! 跟住小朋友們就去左餵牛牛食草, 同埋玩果個揸奶機, 不過可惜無得人手試揸啦 ~ d 奶阿仔勁鐘意飲呀, aunt Jackie 仲請佢飲多枝, 我自已就試左牛奶咖啡, 其實我都係想飲杯 coffee, 因為我真係實在好唔夠訓 ~

下一站就去摘士多啤梨, 開頭個個朋友都同我講無士多啤梨摘啦, 因為已經過左時間, 會將行程改為摘生菜. 點知阿媚姨既然安排到有士多啤梨摘, 雖然唔係咁大粒, 不過小朋友就好開心, 因為摘下都好好玩 ~ 最後我都摘唔夠一磅, 唯有搭夠佢, 另外送左d 百合茄比我地食, 呢個場都 ok 啦 ~

跟住就去最後一個景點啦, 就係薰衣草園, 其實呢度是在近流水響, 環境幾好又有得 BBQ. 一去到阿仔就話要餵羊仔, 於是就同表妹 Jess 一齊餵, 之後我地就去薰衣草堆度影相, 雖然不算大規模, 但比我想像中 ok . 不過唔明點解日本北海道既薰衣草園得紫色, 但唔知點解大陸同香港果d 就綠色多過紫色…. 不過呢個一日遊都幾好玩又平, 尤其小朋友非常開心, 下次會再攪 ~

覆盆子朱古力慕斯蛋糕 【Cacao aux framboises】+ 熱情果白朱古力慕斯蛋糕 (附食譜)

老友生日飯局, 所以又要整餅啦 ! 今次問過主人家 Sharie & Ringo , 佢地都鐘意食朱古力, 再加上我成日想試呢個配覆盆子 mousses 既蛋糕, 於是今次整左個比較複雜既, 但我覺得個樣好靚囉 ~
我今次整左個迷你腰果花版 + 正常 6吋圓形版, 好多人都問我點整 ~ 所以我會 post 個 recipe 比大家 ~~ 呢個就係腰果花迷你版 ~

呢個就係生日蛋糕版 ~

食譜 : (from "Chocolats de Chocolatier - 土屋公二)
(33cm x 8cm 高4cm的長方形模具 or 6.5 吋圓形模)

A) 朱古力海棉蛋糕 (Chocolate Sponge Cake)
材料 :

蛋黃 128g + 砂糖 110g

蛋白 128g + 砂糖 34g

低粉 60g
可可粉 26g
無鹽牛油 38g (坐溶備用)

步驟 :
(1) 蛋黃和砂糖混和，打至挺身；另外蛋白加糖再打起, 收 1/3 蛋白加入蛋黃漿中後, 再加入其餘2/3伴勻。
(2) 將已過篩的低粉和可可粉分三次放入(1)；
(3) 將少許蛋漿和已溶牛油拌勻，再倒回蛋漿拌勻
(4) 我於在整卷蛋的盤上用180度入爐焗約15 ~ 20分鐘。再 cut 出大圓形個迷你腰果花形 (焗爐溫度因人而異)

B) 覆盆子慕斯 (Raspberry Mousses)
材料 :
覆盆子果蓉 100g

覆盆子切碎 30g
砂糖 8g
魚膠片 3g
櫻桃酒 6g
淡忌廉(打至7分起) 90g

步驟:
(1) 魚膠片用冰水浸軟備用；
(2) 紅桑子果蓉和砂糖煮至糖溶，加入(1)拌勻待涼；
(3) 將(2)和打至7分起的淡忌廉拌勻後加入櫻桃酒拌勻；
(4) 倒入朱古力海棉蛋糕模中，將新絴紅桑子平均放在紅桑子慕斯上，放入雪櫃凝固。

(C) 朱古力慕斯 (Chocolate Mousses) 這個 chocolate mousses 既食譜, 吃下去似忌廉凍多過似 mousses, 所以質感比較實在, 好似在吃朱古力雪糕咁 ~

材料 :
牛奶 30g
淡忌廉 45g

可可粉 8g
朱古力(70%) 85g
淡忌廉(打至7分起) 120g
牛油 60g

步驟 :
(1) 牛油放軟備用；
(2) 朱古力用熱水先座溶

(3) 將鮮奶及忌廉加熱至滾, 熄火後再加入可可粉, 用打蛋器攪拌至均勻。

(4) 再次開火，用打蛋器邊攪至可可粉融化。

(5) 再大滾時加入已溶了的朱古力內, 待一會才攪拌, 趁暖時加入牛油用餘溫將其溶化。

(6) 將淡忌廉打至7分起再加入 (5) 再將其倒進模中。

(D) 朱古力淋面
材料 :
水　45g
砂糖 112g
淡忌廉　105g

可可粉　45g
魚膠片　5.4g

步驟:
(1) 將魚膠片浸軟待用

(2) 將水, 砂糖, 淡忌廉放入鍋中加熱至沸點；
(3) 熄火加入可可粉 攪拌均勻，再開火至滾再熄火，加入魚膠片拌勻至溶化, 過篩；
(4) 待涼至40度左右，便可淋到餅面上。

蛋糕組合
(1) 朱古力海棉蛋糕舖在模具底部
(2) 覆盆子慕斯
(3) 朱古力慕斯
(4) 朱古力淋面

蛋糕裝飾 :
(1) 新鮮覆盆子數粒
(2) 可可胚乳
(3) 朱古力片數塊 (貼上轉印紙)

三個壽星同我個蛋糕合照 ~~
同場加映大契整比我既特大七吋咖啡味曲奇 ~~~ 正呀 ~~~ 每位壽星都有得到 Connie 媽既曲奇一份 ~~

另外因為之前買唔到 Raspberry 果蓉, 怕無野整到出黎, 我已經預先買多盒熱情果果蓉, 所以趁仲可以整多個 4 吋 cake 仔, 於是整左個熱情果白朱古力慕斯蛋糕, 餅底用返上面朱古力海綿蛋糕做底。不過個白朱古力慕斯太削, 整得唔好 ~ 下次再試 ~~

個樣好唔掂 ~ 非常地獄 ~~

但個味道又 ok 喎 ~ 不過個熱情果 jelly 硬左d 者 ~~