日式金文畢芝士蛋糕

我鐘意食日式芝士蛋糕, 因為貪佢唔重芝士味, 有次同事帶左日本手信請我食, 是一舊舊的芝士蛋糕, 同平時伊藤家果d唔同, 好特別的芝士味, 並且好香口, 因為佢用左Camembert cheese, 呢隻芝士唔同一般忌廉芝士, 原是法國出產, 本身口感柔軟順滑，鹹味較重且帶有白黴的香氣，風味十分明顯，一般會用黎點蔬菜同蘋果配搭, 用黎做芝士蛋糕, 口味獨特, 但找不到食譜, 於是想試下自已買舊黎整, 但百佳見到總統牌要成 $98 一舊 ~ 太貴啦, 另一隻牌子細舊好多都要五十幾蚊...於是都無買黎試....有日行過吉之島見到一隻雪印出既 ~ 100g 賣$30 一盒, 呢個價錢好合理，買舊普通既 cream cheese 都要廿八蚊 ~ 而家呢個仲要係日本貨, 於是即刻買, 今日有機會整黎食 ~~ 不過個面有d 黑黑地, 唔夠靚, 於是加左糖霜掩飾一下.............

材料有金文畢芝士 (Camembert cheese), 雞蛋, 糖, 淡忌廉, 麵粉同栗粉
就係呢隻芝士勒 ~ 今晚雪凍個蛋糕, 聽日吃 ~~

生八橋和果子 & 抹茶切餡餅

很久前有朋友帶來日本手信生八橋和果子, 吃過之後味道難忘, 個皮QQ的, 同紅豆餡非常夾, 可惜在香港要買黎食, 要去 citysuper 先有得賣, 仲好貴添, 所以都唔捨得買黎食。

八つ橋(八橋餅)，是京都和果子的代表，主要材料是米粉，砂糖和玉桂。最初的八橋餅外型像箏琴，而八橋檢校是近代日本箏曲的始祖，為紀念他而得名。現在以三角形狀，內含紅豆餡料的生八橋餅最受歡迎。

在網上找不到 recipe, 適逢見到烹飪班竟然有得學, 於是立即報名 ~

個班連埋我個三個人咋, 可能無乜人知道呢個 “八橋和果子” 是什麼, 連另外兩個同學黎之前都唔知學整乜野, 話是以為係一粒粒透明的….

今堂是 Winnie 姐教的, 好耐之前都有跟佢學過中式甜品, 佢唔係乜野酒店大師傅, 但佢好有心機教人, 同埋佢真係乜都識…今堂又咁岩佢接受 AM730訪問, 整左好多野食, 我又未食飯, 真係有食神 ~ 岩晒 !!! 試左杏仁曲奇餅, 維多利亞蛋糕, 仲有藍莓芝士條 ~~ 好好味呀 ~~ 我唔食芝士蛋糕都覺得正…留意 AM730幾時 post 個 recipe 先…..
http://www.am730.com.hk/am_cooking.asp

綠茶紅豆慕絲蛋糕 ~ 附食譜

老爺生日 ~ 當然又要整蛋糕, 諗左好耐都唔知整乜好, 問左家人意見, 話想吃紅豆綠茶味的蛋糕, 所以整左呢個自創的綠茶紅豆慕絲蛋糕 ~

綠茶雪芳蛋糕材料:

材料 :

蛋黃 3個
砂糖80g
菜油 50g
水 60ml

低筋麵粉 80g + 綠茶粉10g

蛋白4個

紅豆慕絲材料 :

淡忌廉 200ml

蜜紅豆150g

糖 20g

魚膠片 6g

水30 ml

首先焗左蛋糕先, 用一個6吋圓形模,

1.) 先將蛋黃, 1/3砂糖, 菜油, 水攪勻

2.) 分數次篩入低筋麵粉同綠茶粉於 (1) 內,

3.) 蛋白加 2/3 砂糖打起

4.) 將 (3) 分3次加入 (1)

5.) 放入預熱 180 度的焗爐焗40 分鐘, 出爐後倒扣待涼.

6.) 將綠茶蛋糕打橫切成兩片, 底面不要, 並切細小小外圍, 放一張牛油紙在底, 將一片蛋糕放在6寸圓形可甩底模或慕絲圈內待用

7.) 將魚膠片用30ml熱水開成魚膠液待用 (魚膠片請先浸凍水)

8.) 將淡忌廉加砂糖打至8成起, 加入蜜紅豆攪勻

9.) 分數次加入魚膠液至 (8)

10.) 倒進模內蓋過第一層蛋糕, 再放另一片蛋糕

11.) 再將剩餘的紅豆慕絲倒進蛋糕模內直至模邊

12.) 放入雪櫃雪 3 ~ 4 小時即成

家人食左話好好味 ~外表就有d平平無奇, 切開都幾靚架 ~ 阿仔平時唔食紅豆話d味怪, 今次佢出奇地話正, 食左1/4 個蛋糕, 都算是成功, 個餅偏甜, 所以我在份量中已減糖 ~ 味道都幾夾 ~ 今次都算是大成功 ~~

新玩具 ~ Holga 120CGFN

想買好耐~ 果日去開紅磡, 順便去左宇宙買左部Holga 120CGFN, 見到好多色都唔知點, 但無我想要既桃紅色, 唯有買銀黑色, 因為好似pro D 同埋襟興d, 部機$360, 呢部是用120mm菲林, CGFN是因為這部是玻璃鏡同埋4色閃光燈, 另外買多個 135菲林 轉換器, 咁唔駛成日晒120菲林咁貴 ~不過老闆娘真係好好人, 不厭其煩咁教我點用, 抵佢咁多人幫趁佢 ~~
全部野+一筒120菲林 =$442 ~

時新快餐店 ~~ 終於試到

想試呢間被openrice喻 為最多好評既餐廳, 終於可以試下啦 ~ 我就買左雙層芝士漢堡加雞脾, 試下先....
$11 個飽, 但係真係好juicy , 好多汁, 好有牛肉味, 真係好味過老麥好多 ~ 再試下隻雞脾, 重好味 ~ 佢唔係炸得好勁, 唔乾, 都係好 juicy ~ 可惜位置實在太隔涉, 唔去開紅磡都幾難會經過 ~ 不過真係好好味, 阿仔契媽話d人仲好有禮貌添 ~唔怪之得咁多好評 ~

時新快餐店出面

扒餐Menu

ah cell 個飽 ~

咬左幾啖既雞脾 ~

朱古力香蕉豆腐杏仁批

阿仔契媽生日 ~ 無理由要契媽整比自已整蛋糕架, 所以今次由我操刀, 決定整 RTHK-美味 DIY 之 ~ 朱古力香蕉豆腐杏仁批 !!!

見到就想食 ! 因為朱古力同香蕉好夾, 應該好好味 ~但叫我唧 cream 就慘啦, 好唔掂, 於是我彷效 Italian Tomato 果個 Banana Pie 既做法 ~ 唔需要好高既技巧 ~





我另外再加左朱古力裝飾同埋金箔, 去到餐廳切餅時, 個餅有d溶, 影響左個質感...但都好好味, 尤其是個餅底, 好鬆脆同埋好香~ 同場加演一個 Amigo 拿破倫蛋糕, 好好味但好飽呀 ~~~



在這祝阿仔契媽生日快樂, 身體健康 ~

雙料朱古力鬆餅+朱古力牛油曲奇 (附食譜)

星期六整左雙料朱古力鬆餅+朱古力牛油曲奇

雙料朱古力鬆餅用左阿貓個食譜
朱咕叻小蛋糕 Chocolate Muffin http://www.leisure-cat.com/frm_1359.htm

材料(7cm Muffin模 5個)
無鹽牛油（室溫下回軟）50 克
砂糖 80 克 (我用左 65g)
蛋 1個
低筋麵粉 85 克
可可粉 15 克
泡打粉 1小匙
鹽 1 撮
牛奶 60毫升
核桃 5 片裝飾用 (我無落, 我加左入爐朱古力粒, 鐘意食就落多d)

製作
1.準備: * 先將所有粉類一起過篩。 *無鹽奶油在室溫下回軟。 *焗爐預熱到 170度。
2.牛油用打蛋器打鬆， 分 2-3次加入砂糖， 每次加入砂糖都要攪拌混合， 繼續打發至變白色。
3.加入蛋 和 鹽， 混合均勻。
4.牛奶和粉類分2次加入 步驟3， 迅速混合拌勻。
5.用湯匙將材料 "不" 入 muffin杯到7分滿， 將核桃放在上面用手輕輕壓。
6.放入170度焗爐， 焗30分鐘即可。

材料:

無鹽牛油（室溫下回軟）100 克
糖霜 75g
蛋25g (半個)
低筋麵粉 150 克
可可粉 10 克
製作
1.準備: *無鹽奶油在室溫下回軟。
2.牛油用打蛋器打鬆，加入糖霜打起成 cream 狀。
3.加入蛋攪勻。
4. 篩入麵粉用手搓勻
5. 將麵團分外兩等份, 另一份篩入可可粉搓勻
6.將兩個麵團搓成圓柱型, 跟往將兩條麵團扭在一起, 再搓成圓柱型。用牛油紙包住放入雪櫃 30 分鐘。
7. 拿出後切片, 1cm 厚左右放入已預熱170度的焗爐焗 15分鐘至金黃色即可 ~