Brownies + 栗子忌廉蛋糕 @ my home

Boxing 在我家攪左個 chrismas party + Samuel birthday party, 叫左 KFC之外, 大家都有整好多野食黎, 有 Connie 既沙薑鳳爪, Samuel + Wing 滷水牛展, Sharie 既桂花紅豆糕, 仲有我既 Brownies ~ 樣樣都好好味呀 ~ 不過我唔記得影相呀 ~~~~

呢個就係 Samuel 既 Birthday Cake ~~ 栗子忌廉蛋糕...不過無人知我用黃色果d係乜野黎, 以為我擺炸菜....其實係在 City super 買既日本糖浸栗子....不過好在大家話好味者 ~

切開係咁既, 但脆脆好散, 落得唔夠多朱古力...個份量有d 問題...下次可以落多d ~

其他相請去我 facebook 度睇 ~

聖誕樹頭蛋糕@Stella Home X'mas Party

聖誕節正日去左Stella 屋企開 Chirsmas Party, 主要係比d 小朋友開心玩下, 我就整左個應節既聖誕樹頭蛋糕, 好受小朋友歡迎呀 ~ 原來小朋友係唔怕食 Dark Chocolate ~ 今次整得都算滿意, 反而個淋面有d 唔滑, 下次要整得好d....
同聖誕老人黎張大合照先 ~~

平安夜 ~ 食牛扒 ~

聖誕前去行 Sogo , 見到呢個 Mulit BBQ Grill , 大強同我都好想買, 因為佢可以整串燒, stone grill, 八爪魚丸....但個 sales 話24/12 有大減價, 所以唔買住, 我地等到 24 號去左買 ~ 成 set $398 ~ 抵呀 ~ 於是我地再去買牛扒, 是晚就是玩 grill ~
首先由大強操刀, 整左露筍先 ~
再用塊 stone 整牛扒 ~ Yummy 呀 ~ 唔駛落野都好好味 ~~

仲有大強既拿手煎薯角 ~

今晚好滿足, 唔想出街同人迫又駛 $ , 在家是最好的選擇 ~~

聖誕曲奇之 ~ 榛子牛油曲奇 + 忌廉芝士曲奇

聖誕節又到啦 ~ 無整好多年曲奇, 今年又再整, 今次我主要整比小朋友食, 所以我整左榛子牛油曲奇 + 忌廉芝士曲奇比同事的小朋友同埋老細果三位公子, 榛子牛油曲奇係跟拉人個 Recipe 整 , 味道都幾好, 好脆下, 我用左普通牛油, 同埋今次唧到花但唔記得影相.....

食譜 : http://hk.myblog.yahoo.com/lyon917/article?mid=228

另外忌廉芝士曲奇就跟左 Vanlily 既 recipe 整, 食落好特別, 好脆口, 又有芝士味, 不過三位公子話芝士整曲奇好似怪怪地 ~ 可能外個人好少咁整 ~ 不過希望佢地鍾意啦 ~~

食譜 : http://hk.myblog.yahoo.com/vanlily/article?mid=46099

紅茶牛油曲奇

又整曲奇餅, 因為買左包日本紅茶粉, 類似綠茶粉不過變左係紅茶味, 即刻識下整唧花曲奇先 ~~

但唔知係咪粉太多....好難唧, 第二盤已經唧唔到, 最後搓成圓型算啦 ~

唧花果d 太厚所以中間有少少唔識透, 但味道好鬆化, 好香紅茶味 ~ 果然係正 ~ 下次可以試下整戚風喎 ~

咖啡杏仁曲奇 (附食譜)

聖誕節就黎到啦, 係咁搵曲奇食譜, 整比d friend 嘆下 & 享受下節日氣氛 ~

呢個曲奇好味呀 ~ 好香牛奶咖啡味, 又好脆下, 大強就話有陣爆谷味....我又唔覺得係喎 ~

咖啡杏仁曲奇 (約 20 件) http://hk.myblog.yahoo.com/lyon917/article?mid=1622

材料:
牛油 - 60g
糖霜 - 23g (可以多少少)
低粉 - 65g
粟粉 - 15g
杏仁片 - 20g
咖啡粉 - 1/2 湯匙 (可以多少少)
熱水 - 1/2 湯匙

做法:
1. 杏仁片 180 度焗 5 分鐘
2. 牛油加糖打至奶白色輕身
3. 熱水溶咖啡粉, 加入牛油打勻
4. 加入已篩麵粉, 混合至尚見有麵粉時加入杏仁片, 拌勻.
5. 用保鮮袋包起麵團, 做成約 3cm x 3cm 正方型長條 (或其他長條形), 入雪櫃雪硬.
6. 切成約 1/2 cm 厚, 180 度焗 15 分鐘.

聖誕朱古力屋

又去 Winnie 姐度親子班啦, 今次係整好有聖誕氣氛既聖經朱古力屋 ~ 今次仲有親子雜誌既記者黎影相, 會影低我地上堂的經過， 本書好似 1 月中出版...不過1 月中先介紹聖誕朱古力屋會唔會太遲 ....
你睇下 ~ Heaton 畫到d 樹漏晒漿... 唧得太多啦.... Heaton 全程怪住 meet 間屋黎食 ~~ 哇 ! 好勞氣呀 ~~~~

咦 ~ Bella 咀角有d 野...唔通偷食 ?

Bella 呢個靚好多 ~ 因為佢媽咪有份幫手整 ~ 同埋無係咁食間屋 !!

Bella 同媽咪黎張合照先 ~

Habibat Pre-launch party

接到友人邀請佢有份開既 bar & lounge pre-launch party, 因為近屋企, 所以同大強去睇下 ~

Habibat lounge 地點位於灣仔合和中心對面新起的 Qre Plaza, 成幢 building 都係飲飲食食, 而呢間bar 位於29/F 最高果層, 唔講唔知呢幢 building 有29 樓咁高 ~

由於是 pre-launch party, 是日酒水全免, 我又麻麻地飲酒, 所以大強叫埋 Samuel 去陪佢 ~

一上到去 ~ 嘩好熱鬧, 好多人同埋有加上有強勁既音樂, 有DJ現場打碟, 氣氛幾好, 但因為太多人既關係, 其實都唔係幾睇到整個 lounge 既佈置如何, 但同 Census ( 我wedding party 果間bar) 有d 相似, 友人T先生話原來佢地同 Census 老闆們有份投資, 仲帶左我地入 VIP area, 係個露天既 area , 為 VIP area, 望出去會見到合和同埋附近d 高樓大廈, 都幾好 view, 另外出面仲有個天台, 上面有間玻璃屋, 不過平時係唔開放既, 只供 priviate party 使用 ~ 咁又幾好喎 !

我唔好酒, 由於太多人既關係我簡單地叫左杯紅酒, 但無晒紅酒杯 (洗唔切) , 於是用左高身啤酒杯斟比我, 攪到我飲多左, 有d wing wing 地頂唔順要返屋企訓啦, 因為第日又要返工, 大強同Samuel 就玩多陣, 後黎先知是晚有成 500 人 (O_o ) ! 唔怪之得咁熱鬧啦 ~~

呢間 lounge 我估平日無咁多人都幾好坐, 相信消費亦無銅鑼灣咁高, 遲下可以考慮去果度飲野傾計 ~

The habitat lounge
29/F, QRE Plaza
202 Queen's Road East,
Wan Chai,
Hong Kong

C.S hotline : 3758 9000

聖誕薑餅人

今次又去左 winnie 姐度學聖誕親子班 ~ 聖誕薑餅人, 岩晒小朋友 ~ 因為好多小朋友都鐘意整 ~

今次 Aunt Stella 同 Bella 都黎左

你睇 Bella 幾聚精會神設計緊個薑餅人....

呢d 就係 Aunt Stella 同 Bella 整出黎既作品啦, 我最鍾意 "大細超" (右一)

輪到我地呢組, 已經焗好第一轉既薑餅人

點解 Heaton 個餅上無 deco ? 因為佢已經食晒d m&m....

呢d 係我地呢組既製成品 ~

Bella 同 Heaton 玩得好高興 ~

Heaton : 你睇下我粒薑餅人幾 "迷你" !~

仲有 兔仔 Aunt 同 Donald 呢一組

Donald 仲諗緊應該點整先好....

呢個就係 兔仔Aunt 同 Donald 既製成品 ~ 我鍾意佢個髮型 :P

南瓜兩味 ~ 南瓜鬆餅 + 南瓜芝士曲奇 (for 狗狗)

今次整左南瓜鬆餅, 因為買左個南瓜, 今次呢個做法係用蛋加糖霜同埋溶牛油...無脆面, 食落唔夠甜同埋唔夠南瓜味....下次整 muffin 都係用牛油 + 糖打起果個方法我覺得好味d ~ 同事話個質感比較"削", 我估是因為南瓜會出水, 所以會"削削"地, 我未食過出面整果d, 所以唔知係咁應該係咁...不過就同上次香橙 muffin 質感完全唔同 -_- "

同場加映" 南瓜芝士曲奇" (狗狗私房菜), 送比朋友的狗狗作聖誕禮物 ~

材料（50件份量）：
南瓜茸60g
麵粉160g

麥皮20g

蜂蜜3匙

鮮奶1匙

橄欖油1匙

芝士粉30g

蛋1隻

步驟：

1.) 將所有材料混合。

2.) 加入南瓜茸後，搓成粉團，放入雪櫃冷凍45分鐘，取出印模形狀。

3.) 以160度預熱焗爐5分鐘，將曲奇放入以160度焗15-20分鐘，後放涼，即成。

貼士：南瓜茸用微波爐焗至軟身，較烚腍更能保存原味。

La Maison du Chocolat ~ 馬卡龍

呢盒馬卡龍唔係我整, 但有幸吃到2 粒 ~ 6 粒/$120。

呢間坐落於 PP 入面既高檔朱古力店 La Maison du Chocolat , 入面賣既朱古力同糕點好似珠寶同藝術品咁, 都唔敢行入去望, 廚窗外望到價錢更加唔敢行入去。呢個馬卡龍食落去唔太甜, 中間夾左朱古力醬, 個餅既味道就唔講都唔係太知道係乜野味, 不過我估一粒是 Raspberry, 另一粒是 Cherry, 同事就吃左 Vanilla 味 同朱古力味... 不過另外一樣野仲好味...就係一餅黑朱古力, 入面有各款果仁, 橙皮, d果仁超好味, 又好香橙味, 不過要 $190 /100g, 真係貴過買水晶...

其實賣到 $20 一粒, 中間既工夫同材料都唔少, 所以其實都唔係唔值, 不過唔食又唔會有問題, 話晒$20 cheap cheap 地都仲買到個 lunch box....叫做食過就算啦...

Bit 仔霆

話說呢排阿仔鐘意改花名, 成日叫我改佢花名, 早排叫我以後叫佢 "吳好郁", 呢幾日又改名, 叫 "Bit 仔霆", 完全唔知點解, 不過佢即席畫左幅畫...話呢個就係 "Bit 仔霆"...

我知佢在學校都係咁改同學花名, 但話極佢都係咁...好唔尊重人...老師比左本書佢睇, 叫"尊重", 希望佢學識點樣尊重人同埋尊重人地個名...唉 ! 都唔知點教 ....

新版面 ~

哈哈 ~~ 係咪好有 X'mas 氣氛呢 ? 誠意推介呢個網 ---- > http://gbmaterials.oops.jp/



入面d 素材好正 ~ 我試左幾個都好靚, 你地都可以參考下 ~

失敗的 --- 草莓馬卡龍 (Macaron) - 附食譜

成日想整馬卡龍, 但試過一次整朱古力味...失敗!!! 完全慘不忍睹, 成盤無一粒剩....今次再試係因為公司老闆請我地食 $20 一個既 Macaron...(超貴呀 !!) 好唔抵得佢要賣咁貴, 橫豎屋企有材料, 我要整 !!!!
今次整草莓味, 未入爐前個樣都得得地 !!! 杏仁粉我今次篩左先磅, 所以個糊好好多 ....但焗到一半個面就烈左...裙邊岩岩出現時, 但無得救啦, 仲用牛油紙...超難甩 !!! 最後掉晒....唔順氣整多一轉, 整細粒d 用返不沾布, 但都係爆面 !!!!! 激死我啦 !!! 有人話放焗爐下格, 但有d人就話要隔底火, 究竟邊樣真 ?? 夜啦, 呢次有一粒無爆, 叫做好過無, 下次試放中間....唔該有人知就話我聽點解會爆面 !!!! 由於太樣衰, 無心機整個餡, 就咁痴埋算數 !!!

食譜
杏仁粉: 25g (我篩左先磅)
草莓果汁粉: 3g (可改可可粉或粟粉造原味)
糖霜: 38g
===將以上粉類過篩備用===
蛋白 : 23g
砂糖: 23g

做法 :
1. 將蛋白打至起泡，加入砂糖後打成忌廉狀。
呢個step如果打得唔夠，唧出黎會瀉身，成品較為扁身。如果打得太起，唧出來時會有紋，成品表面不夠平滑。

2. 將過篩o既粉類分兩次加入拌勻。

3. 加入果汁粉 (記得攪勻) 如做原味想加色就可以最後加。普通food colouring就可以了。

4. 最後將蛋白糊放入唧袋，在牛油紙上唧成圓型大概2cm直徑一個，預熱焗爐 180度。等30 鐘表面乾透便可入爐。

5. 入爐即時降溫至150度，焗10分鐘。(於差不多8-9分鐘就會有裙邊出現。)
然後慢慢調至120度焗5分鐘，
再慢慢調至110度焗5分鐘。一共20分鐘。
降溫時要慢，太約2分鐘調低10度。
如用牛油紙，出爐後要立即用凍水在牛油紙底下掃幾下，令餅仔容易甩出。我自己用不黏布，較方便。

香橙戚風蛋糕 (附食譜)

事原因為阿仔話學校老師個bb生日, 佢要整一個蛋糕送比佢, 於是我問個佢個bb幾時生日, 阿仔唔知無答我. 之後有一日, 阿仔話老師個bb 12月2號生日, 要整蛋糕送比佢, 我覺得好奇怪, 因為知道老師放完產假無耐, 又唔係bb滿月....了解下原來係3個月生日 ~~ 於是整個簡單既"香橙戚風蛋糕"比bb 慶祝一下啦 ~~ 不過阿仔話 "bb未識食蛋糕, 點算 ?" 我話唔怕...可以教佢吹蠟燭 ~ 嘻嘻"

材料有多, 因為我用6吋模, 有剩整多幾個細蛋糕仔 ~

材料 (7 inch 模) :
蛋黃 (L) 3隻
糖 70g

菜油 35ml
君度橙酒 1茶匙
鮮榨橙汁 60ml
橙皮蓉 1 茶匙
低筋麵粉 80g
蛋白 (L) 4 隻

做法 :
1) 先將焗爐預熱180度
2) 鋼盆放入蛋黃, 依次加入 1/3 糖、油混合, 然後再倒入君度橙酒和鮮橙汁拌勻。
3) 加入橙皮蓉, 再加入低筋麵粉, 用打蛋器攪勻至光滑。
4) 將蛋白打起, 分兩次加入其餘 2/3 的糖

5) 取1/3蛋白霜加入3)內攪勻, 加入剩餘的蛋白霜攪勻但盡量不要將氣泡攪破。
6) 將麵糊從稍高一點的位置一口氣倒入模中。
7) 用兩手將模提起然後放下輕敲。 讓裡面的氣釋放出來。
8) 放入焗爐以180度焗30分鐘。
9) 焗完後馬上連模倒扣過來。 放在返轉的杯子上冷卻。
10.) 冷卻後脫模即成。


裝飾糖霜
材料:

糖霜 200g

君度橙酒 30ml

水 10 ~20ml

做法 :

1) 將糖霜放入小煲內加入橙酒攪勻

2) 先加入小量水攪勻, 直至糖霜無粒粒

3) 開爐稍為加熱至體溫溫度 *(不要過熱, 過熱糖霜會變透明色)

4) 趁熱淋在蛋糕面上待涼即成。