盧廣仲 Live @ Hard Rock Cafe

難得知道廣仲能再次來港獻唱, 非常高興, 第一時間去買飛, 但係已經得返 Dinner + Concert 既飛, 不過都好, 有得優先在近距離睇到廣仲個 show.

後尾知道當晚廣仲亦都係最後一個 Artisrt 在 Hard Rock Cafe Hong kong 表演, 順便 farewell 埋佢 ~

果晚是指定既 set dinner, 講真...唔係咁好味...不過都尾聲...廚師都無乜心機整....我叫左個 ribs...我覺得一般...旺旺話直頭無味呀....有 Haggen Dazs 雪糕, 不過無得揀味...都好啦 ~

有兩張生力啤酒 coupon, 不過其實佢又無限量 refill, 不過我都是飲左一杯者...因為都唔好飲....

戲肉黎啦... 我地食完飯21:00 左右工作人員開始執檯, d 人已經開始霸定位, 但又比工作人員猛叫企後d企後d, 都唔知究竟想點, 於是我地就退到去 Bar 檯度....原來佢地要拖地....但我地開頭都唔明點解要拖地, 因為我地都未黎 Hard Rock 睇過 show....就係呢個時候...拖完地就叫我地向台前坐係地下, 我二話不說就標左上前面, 坐左第二排左右, 但就同旺旺佢地失散左....因為比其他人迫實晒, 都上唔到黎我度...但其實我都迫到隻腳唔知放係邊....好辛苦...個地下又硬..... 等左幾個字, 出面持 concert 飛既朋友都入場啦, 我地見到 2R, 潚潚, 大塊田同埋阿澤都有黎睇...

22:00 正式開始啦, 廣仲一開始就唱左"Qué te pasa？你在干嘛？", 攪到大家非常 high 啦 ~~ 大碟入面唱左 "別殺我", "我愛你", "好想要揮霍" ~ 假音部份好正呀 ~ 同唱片一樣 ~, 仲有 "寂寞考", "100種生活"," Boring", "早安晨之美", encore 唱左"無敵鐵金鋼", 其間都有唱左一首閩南話既歌, 唔知叫乜野名, 仲有 Jackson Five 既" I want you back", 新歌 " 七天" 都非常好聽 ~~ 因為無band 既關係, 廣仲話帶左佢既朋友 "effect pedal" 幫佢手, 不過佢話同佢唔係咁熟...未知點用, 非常攪笑 ~

個 show 23:30 完, 雖然短短個半鐘, 但氣氛好好, 佢把聲真係好好聽 ~ 下次廣仲再黎我都會睇架 ~~